Veldgewas is op zeuk nao Mestreechse sjrijvers

Veldgewas is ’n online poëziemagazine wat weurt oetgegeve door Veldeke Limburg. In Veldgewas (nao ’t “weeldreg veldgewas” oet ’t Limburgs volksleed) weure 10 kier per jaor gediechte en korte verhaole gepubliceerd in de Limburgse taol. Alle dialekte vaan Noord tot Zuid in de provincie zien daobij welkom. Meh Mestreech blijf daobij get achter. Veer höbbe wel zoe noe en daan tekste gehad vaan Hortense Brounts, vaan Yuri Michielsen en vaan Wim Kallen (‘ne Mestreechteneer dee noe in Sittard woent). Meh dao blijf ’t daan ouch bij, oonderwijl veer devaan euvertuig zien tot dao väöl mie sjrieftalent in Mestreech moot zitte.

Dus es geer nog get gediechte of verhaole in de laoj höb ligke die geer gere mèt andere wèlt deile, of es eur diechaojer vol löp meh geer neet wèt boe nao touw mèt eur inspiratie: sjik euren teks ins nao de redactie vaan Veldgewas en geer zalt zien tot geer mèt enthousiasme oontvaange weurt. Geer kint altied op ’n reactie rekene en es ’t eve geit ouch op ’n plaots in ein vaan de volgende nómmers vaan ’t online magazine.

En es geer zègk: iech wèl iers wel ins kieke wat dat Veldgewas veurstèlt: geer kint uuch gratis abonnere en daan krijg geer 10 kier per jaor ‘ne nuitsbreef mèt ’n euverziech vaan wat dee nömmer vaan Veldgewas te beeje heet en nog mie intrèssante verhaole euver de Limburgse taol. Dao stoon ouch gediechte en verhaole in die gesjreve zien in ander Limburgse dialekte es ’t Mestreechs. Meh dao hoof geer neet bang veur te zien. Es ze ech meujelek te leze zien, zoewie dat in ’t Kèrkraojs wel ins ’t geval is, daan plaotse veer dèkser ’n Nederlandse vertaoling debij.

Laot Mestreech ins vaan ziene bèste kant zien en verras us mèt sjoen gediechte of verhaole in de sjoen Mestreechter taol. Geer hoof gein rekening te hawwe mèt de spelling: de redactie gief uuch es gewins gere advies op dat gebeed. Op de website vaan Veldeke Limburg vint geer alle informatie euver Veldgewas en kint geer ouch aw nómmers bekieke. Daoveur hoof geer mer hei te klikke.

Aander verhaole

Seksime, zuug ‘t, beneum ‘t, stop ’t

Seksime is ‘n väöl besproke oonderwerp en daorum heet ‘t Human Rights Channel vaan de Raod vaan Europa ‘n manifest tege seksisme gemaak. Neve ‘n oetgebreide oetlègk euver ‘t oonderwèrp, bevat ‘t manifest ouch ‘ne kwis boemètste tes in welke maote totste zelf seksistisch bis. Um zoe väöl meugelek Europeaone te bereike, is ‘t manifest in väöl Europese taole. En dat is nog neet alles, ‘t is ouch vertaold in versjèllende regionaole taole, boe-oonder ’t Mestreechs. Veldeke Mestreech moch de Limbörgse vertaoling verzörge, die d’n titel Seksime, zuug ‘t, beneum ‘t, stop ’t kraog.
‘n Bezundere opdrach boe veer mèt väöl plezeer aon höbbe gewèrk.

Lees wijer

Patrick Jaspers: Wie is dat, ’t sjrieve vaan e Mestreechs vastelaovensleedsje?

Nouw, eigelek zjus ’t zelfde es ’t sjrieve vaan eder aander leedsje. ’t Groete versjèl zit ‘m veurnaomelek in ’t thema en de wijs. Daoneve dink iech tot ederein dee e leedsje sjrijf veural ‘ne geistege geis moot höbbe. ’t Winne vaan ’t vastelaovendsleedsje is in gein wäörd te besjrieve. Zeker umtot ’t veur miech d’n ierste kier waor. Dat te kinne deile mèt mien vrun vaan “de Aspergepiepers” waor ouch e sjoen momint. De reis dao naotouw en alles wat denao op diech aofkump, ’t blijf geweldeg. Daan noe ’t perces vaan e leedsje.

Lees wijer

Trökblik op ‘t vastelaovendssezoen

Dao zien ze weer, De Tempeleers! Neve de jaorlekse Vastelaovendsgezèt, doen veer es Veldeke Mestreech nog mie veur deze sjoen organisatie. Eder jaar prizzentere de Tempeleers hun jaorverslaag roond de 11e vaan de 11e. Zie loere mèt foto’s en verhaole trök op ‘t aofgeloupe carnevalssezoen. Zoe oontsteit ‘n prachteg tiedsdocumint vaan ’t sjoenste fies vaan ‘t jaor. ‘t Is dus neet zoe gek tot ‘t jaorverslaag door väöl Mestreechtenere weurt geleze! Uiteraard is dit jaorverslaag gehiel in ’t Mestreechs gesjreve. Veldeke Mestreech deit al jaore de spellingscorrectie vaan dit jaorverslaag en genete daan weer vaan de trökblik op e sjoen vastelaovendssezoen!

Lees wijer

Leesplenkske 40 jaor

Wee heet 't neet thoes stoon; 't Leesplenkske vaan de Mestreechter taol? In 2023 is 't 40 jaor geleie tot 't Mestreechs Leesplenkske woort geprizzenteerd. En sinds deen tied zien nao sjetting mie es 16.000 leesplenkskes verkoch. Genóg reie um de 40ste verjaordaag te viere, dachte veer zoe.

Lees wijer