Euver 't Mestreechs
De zangerege klaanke vaan de Mestreechter taol, ’t Mestreechs, zweve d’ch tegemoot este de stad binnekums. De taol mèt invlode oet ‘t Frans en Duits is sierlek en gief Mestreech ‘ne charmante en bezundere sfeer. Joonk en aajd, gebore Sjeng of Hollender: de taol is vaan us allemaol! Veer vaan Veldeke Mestreech zien gruuts op de taol en hawwe häör gere leveteg, same mèt de inwoeners vaan Mestreech.
De Mestreechter taol is belaankriek veur de stad, ‘t gief häör ‘n unieke oetstraoling, is ‘n oonderdeil vaan de identiteit. Historie, hede en touwkoms zien oonlosmakelek verboonde door de taol. De taol is ‘t sejske dat de stad häör oonbetwisde charm gief. Euveral boeste kums huurste en zuuste ‘t Mestreechs, wat zörg veur verbinding tösse de inwoeners. Ze spreke lètterlek dezelfde taol! De huurs en zuus ’t Mestreechs euveral: in de winkel, op ‘t terras, ‘t sjaolplein, in d’n theater, op ‘t werk en mèt ‘t jaorleks carneval, oftewel Vastelaovend!
Same hawwe veer ‘t Mestreechs leveteg
Es Veldeke Mestreech wèlle veer de taol laote leve en ouch veur touwkomstege ginneraties levendeg hawwe. ‘t Leefste hure veer op ederen hook ‘t Mestreechs. Veer doen dit neet allein, meh mèt 1.000 enthousiaste lede. Joonk en aajd zètte ziech in um de taol te spreke, te sjrieve en te laote klinke. Veer helpe mèt vertaolinge, geve tips euver spelling en grammatica en organisere jaorleks activiteite boebij ‘t dialek centraol steit, wie ’t Groet Mestreechs Dictee, de Kaffeekwis en de Femilie Keersmesspeurtoch. Same veur ’t Mestreechs!
Mètdoen?
Veer wèrke gere same mèt aander Mestreechse initiatieve. Dink aon toneelstökke in ’t Mestreechs, beuk die oetkoume en activiteite boebij de Mestreechter taol centraol steit. Höbste ‘ne leuke tip? Laot ‘t us weite!
Nui lede zien altied welkom um same mèt us ‘t Mestreechs leveteg te hawwe. Wèlste lid weure? Dat vinde veer sjiek!
