Kiekoet

Speciaol Algemein Ledevergadering

Es vereineging maakste aofspraoke wieste geis samewèrke. Dees aofspraoke zien vasgelag in de zoegenaomde statute. In die statute steit oonder mie wat eus doelstèlling is en watste es bestuur en lid wel of zjus neet maags doen um dat doel te bereike. De statute vaan eus vereineging zien opgestèld in 1984 en in de aofgeloupe bekans 40 jaor neet veranderd. Es bestuur wèlle veer gere de statute modernisere en e paar aofspraoke verandere. In een speciaol Algemein Ledevergadering (ALV) bespreke veer mèt uuch de veurgenome wijzeging vaan de statute vaan de vereineging Veldeke Krink Mestreech.

Es bestuur wèlle veer gere de statute modernisere en e paar aofspraoke verandere. De statute zien neet mie vaan dezen tied. Zoe kóste veer in de corona-periood de ALV neet digitaol hawwe, umtot dat neet waor geregeld in de statute. Dat wèlle v’r noe verandere.

Neve de statutewijzeging wèlle veer ouch ’n Hoeshajdelek Rigglemint in ’t leve rope. In ’t Hoeshajdelek Rigglemint höbbe v’r aofspraoke, regels en riechlijne gezat es aonvölling op de statute. ’t Besjrijf de daogelekse gaank vaan zake. Veur ’t opzètte en verandere vaan ’t rigglemint hove v’r neet nao de notaris, wat tied en cent spaort. Es lid stump geer ouch euver d’n inhaajd vaan ’t rigglemint.

Oonderaon dees pagina vint g’r wijere informatie euver dees speciaol ALV.

Aonmelle

In verband mèt de organisatie vraoge veer uuch veur 3 mei aon te melle. Aonmelle via oonderstaonde knóp.

Aonmelle

Agenda ALV

  1. Opening
  2. Statutewijzeging
  3. Stumme
  4. Sleting

 

Poos

Lezing/Prizzentatie euver Fons Olterdissen, door Jan Janssen

ALV

Prizzentatie euver Alfons Olterdissen

Um uuch neet veur ein agendapunt nao Heugem te laote koume, höbbe Jan Janssen gevraog get te koume vertèlle euver Alfons Olterdissen. Dit jaor is ’t naomelek 100 jaor geleie tot Fons Olterdissen storf. En daorum heet Jan Janssen ’t book ’n Iew wijer gesjreve.

’t Book ’n Iew wijer is ’n hommage aon Alfons Olterdissen, dee Mestreech hiel get heet naogelaote. Dink aon oonder mie prachtege verhaole, kemikke opera’s en ’t volksleed. In zien prizzentatie zal Jan us mètnumme in wie Mestreech de aofgeloupe iew is um gegaange mèt de naolaotesjap vaan Olterdissen.

Olterdissen
/ˈɒˑfspʀɒˑk/
aofspraok

Informatie euver de speciaol ALV op 10 mei 2023

Alweer ’n speciaol ALV?
Dat klop. Want op de ALV op 29 miert waore neet genóg lede aonwezeg um te kinne stumme euver de statutewijzeging. Volges de statute vaan noe moot naomelek twiederde (2/3) vaan de lede aonwezeg of vertegenwoordeg zien. Oftewel, vaan de 934 lede die v’r noe höbbe, móste minimaol 623 aonwezeg zien. Dao waore mer 65 lede aonwezeg. Neet genóg dus.
En dat beteikent tot veer ’n nui ALV mote organisere. Dat doen v’r op goonsdag 10 mei, um 20.00 oor.
Op die nui vergadering maak ’t niks oet wieväöl vaan de lede aonwezeg zien. De lede die wel aonwezeg zien  stumme daan euver ’t wel of neet verandere vaan de statute.
Stump op 10 mei mie es 2/3 vaan de aonwezege veur? Daan weure de statute gewijzeg.

Wat goon v’r verandere?
Op de ALV vaan 29 miert zien ’n aontal vraoge gestèld euver de statute. Die weure op dit momint mèt de notaris besproke. Zoe gaw heer de aonpassinge heet gedoon, sjikke veer uuch ’n nui versie vaan de veurgestèlde statute touw. Moch g’r dao nog vraoge euver höbbe, daan hure veer dat gere veur de ALV vaan 10 mei.

Iech kin neet debij zien!
De statute vaan noe laote ’t neet touw tot g’r de ALV digitaol kint bijwoene en/of digitaol kint stumme. G’r moot fysiek aonwezeg zien um te kinne stumme. Moch g’r neet kinne koume op 10 mei, daan kint g’r ’n aander lid vraoge um naomes uuch te stumme. Völt daan bijgevoog formuleer in en gef ’t ingevöld formuleer mèt aon ’t lid dat naomes uuch geit stumme.

Eder lid maag mer veur maximaol 1 aander lid es gemachtegde stumme.