De Nuie Mestreechsen Dictionair
De Nuie Mestreechsen Dictionair

In 2004 is De Nuie Mestreechsen Dictionair oetgegeve. Neet zoe mer e book, want dit projek heet al mèt al zoe'n 25 jaor gedoord!

In ’t stökske euver de nui spelling steit al oetgelag tot d’r ‘nen “Diksjenaer vaan ’t Mestreechs” waor. Naomelek dee vaan dr. Endepols, oetgegeve in 1955. Deen “diksjenaer” woort, en weurt nog altied, door väöl Mestreechtere “d’n Endepols” geneump. Wat is daan ’t versjèl tösse d’n Endepols en de nuien dictionair...?

  1. In d’n Endepols stoonte de trefwäörd vaan ’t Nederlands en Mestreechs doorein. De nuien dictionair is oonderverdeild in twie gedeiltes: Mestreechs-Nederlands en Nederlands-Mestreechs. Dat maak ’t opzeuke vaan wäörd e stök euverziechteleker.

  2. De nuien dictionair is gesjreve in de Veldeke spelling. De sinds 1999 officieel spelling vaan de Mestreechter taol. Zuug ouch De nui spelling.

  3. In de nuie is veur eder woord ’n semi-fonetische sjriefwijs touwgevoog, die dudelek maak wie e woord oetgesproke weurt.

  4. ’t Aontal trefwäörd in de nuien dictionair is ten opziechte vaan d’n Endepols flink oetgebreid!

  5. De lètter C kump in de nuien dictionair beter aon bod. (ciefer, clojn, cojboj, cirk, compleminte...)

  6. De werkwäörd en veurnaomwäörd zien in de nuie volledeg oetgewèrk. Etc.


’t Nederlands-Mestreechs gedeilte vaan De Nuien Mestreechsen Dictionair kint g’r via euze website dus raodplege middels d’n Digi-Dictionair. Daobij höbbe v’r de werkwoordcattegorie aon eder werkwoord gekoppeld, zoetot g’r dit neet zelf hoof op te zeuke.

Wèlt g’r oetgebreidere informatie euver de wäörd in d’n Dictionair, daan kint g’r dit naoslaagwerk in de winkel koupe. Loert bij Beuk boe dit kin.
Agenda

Will Wintjens
Wäörd (vaan de CD Wäörd)
’t Heet al jaorelaank bij us thoes flink gestöb
gegoejd mèt ’t servies dat iech georve höb
en al de wäörd oet de Mestreechsen dictionair
zien mie es ins gebruuk en dèks hiel ordinair
De höbs diech vreiselek aon miech gesjaggerneerd
es ’t diech oetkaom miech ’n week laank genegeerd
Iech höb diech stèllekes verwins
bin jummers ouch mer ’ne mins
meh dao zien dinger dieste neet zoemer verzins
Al löp ’t dèks gans oet de klaw
weit iech tot iech nog altied vaan diech haw
in mienen droum zoewie venach
fluuster iech de wäörd die iech diech noets höb gezag

Lees wijer


Copyright © 2013 Veldeke Krink Mestreech