Euver de Krink Mestreech

De vereineging Veldeke Limbörg besteit op ’t ougenblik oet 11 kring (lokale aofdeilinge). Veldeke Krink Mestreech is ein vaan die kring. De Krink Mestreech tèlt mominteel mie es 1000 lede en is daomèt ein vaan de groetste vereineginge vaan Mestreech.

Eder jaor organiseert de Krink Mestreech e stök of vief versjèllende aovende, boe-oonder beveurbeeld ’ne Keersaovend en ’t Vastelaovends Cabberèt. Wijer koume op dees aovende lezinge of activiteite op taofel, die betrèkking höbbe op Mestreech of Limbörg. De Mestreechter taol steit hei-in naogenóg altied centraol. Veldeke Krink Mestreech gief geregeld beuk oet, die óf in ’t Mestreechs zien gesjreve, óf oonderwerpe behandele die get mèt Mestreech te make höbbe.

Historie

In ’t begin vaan de 20e iew maakde ’n aontal bekinde Limbörgers ziech zörg euver de dialekte vaan eus provincie. Ze waore bang tot die zouwe verdwijne door d’n invlood vaan ’t Hollands. Ze riechde de vereineging Veldeke Limbörg op, die tot doel had: Het behoud en de bevordering van de Limburgse dialecten.

Euver Henric van Veldeke

D’n diechter Henric van Veldeke leefde in ’t midde vaan de 12e iew. Vermoedelek is heer örgens in de buurt vaan Mestreech, in ’t veld(eke), gebore. Mesjiens in de umgeving vaan Hasselt. Heer waor d’n ierste dee neet in ’t Latien, meh in ’t Maoslands, dus in de volkstaol, diechde. D’n ierste ‘Nederlandsen’ diechter.

Heer is veural bekind gewore door e groet gediech wat heer maakde; Het leven van Sente Servaes. Meh heer sjreef ouch väöl leefdesgediechte, minneliederen, in zien moojertaol. Zoe sjreef heer euver Mestreech:

"In eynen dal scoen ende liecht
Daer twee water tsamen gaen
Eyn groot ende eyn cleyne
Claer, schoen ende reyne
Dats die jeker ende die mase
.............
Des is die stadt daer nae
Gheheiten traiectum"

Agenda

Copyright © 2013 Veldeke Krink Mestreech