Activiteite

Veldeke Krink Mestreech organiseert veur häör lede eder jaor ’n aontal activiteite die in ’t verlengde ligke vaan eus doelstèllinge. Ze höbbe dus altied te make mèt eus taol of cultuur. De mieste vaan dees activiteite zien allein bij te woene door lede vaan de Krink Mestreech. Um uuch e beeld te geve vaan dees activiteite zalle v’r hei oonder ’n opsomming make:

Vastelaovends Cabberèt

Op dit momint mesjiens wel ein vaan eus bekindste activiteite! ’t Veldeke Vastelaovends Cabberèt weurt jaorleks e paar weke veur de vastelaovend opgeveurd door euze cabberètgróp in de Bonbonnière. Dit evenemint is euveregens ouch veur neet-Veldeke lede touwgaankelek. Veldeke lede kriege euveregens wel korting op de kaarte. Daobij weure zie ouch in staot gestèld um e paar weke veur d'n officiële kaartverkoup al kaarte te koupe.

Lezinge

Eder jaor organiseert de Krink ’n paar lezinge, die dèks ouch weure gecombineerd mèt ’n dia- of fèlmprizzentatie. ’t Is ouch gebrukelek tot d’r op d’n aovend vaan eus jaorvergadering ’n lezing of prizzentatie weurt gehawwe.

Excursies

De lèste jaore hawwe veer ouch mie excursies. Op ’t program stoonte oonder andere de Apostelhoeve, Kestiel Eijsde, ’t Limbörgs Museum en de Amerikaonse begraofplaots in Mergraote.

Agenda

Copyright © 2013 Veldeke Krink Mestreech