De nui Spelling

Edere Mestreechteneer heet wel ins gehuurd vaan “d’n Endepols”. Deen “Diksjenaer vaan ’t Mestreechs” versjijnde in 1955 en is bekans 40 jaor laank dé rifferentie gewees veur ederein dee ins get wäörd in ’t Mestreechs op pepier wouw zètte.

Wie sjoen en oetveureg deen dictionair ouch is, ‘r is neet altied eve consequent wat de spelling betröf. De sjrijver, Dr. Endepols, heet in deen tied ouch noets ’t veurnumme gehad um ’n echte spelling veur ’t Mestreechs te oontwerpe.

In 1992 sjreve Pol Brounts zaoleger en Phil Dumoulin e beukske boe-in me op ’n späölse meneer kin liere spelle in ’t Mestreechs: Speulentere spelle. Dees twie auteurs hadde wél de bedoeling um veur ’t Mestreechs ’n dudeleke en good oonderbouwde spelling te ‘make’ en dat is hun ouch gelök!

In 1999 heet ’t stadsbestuur vaan Mestreechs de door Brounts en Dumoulin veurgestèlde spelling jummers vasgelag es de officieel spelling vaan ’t Mestreechs.

Alle beuk die de Veldeke Krink Mestreech (zuug oonder Oetgaove) sinds 1992 heet gepubliceerd, zien gesjreve in dees zoegenaomde ‘nui’ spelling. Ech ‘nui’ is ze evels neet, want daoveur heet ’t noets ’n aander officieel spelling gegeve.



Agenda

Will Wintjens
Wäörd (vaan de CD Wäörd)
’t Heet al jaorelaank bij us thoes flink gestöb
gegoejd mèt ’t servies dat iech georve höb
en al de wäörd oet de Mestreechsen dictionair
zien mie es ins gebruuk en dèks hiel ordinair
De höbs diech vreiselek aon miech gesjaggerneerd
es ’t diech oetkaom miech ’n week laank genegeerd
Iech höb diech stèllekes verwins
bin jummers ouch mer ’ne mins
meh dao zien dinger dieste neet zoemer verzins
Al löp ’t dèks gans oet de klaw
weit iech tot iech nog altied vaan diech haw
in mienen droum zoewie venach
fluuster iech de wäörd die iech diech noets höb gezag

Lees wijer


Copyright © 2013 Veldeke Krink Mestreech