Hortense Brounts (09.04.2008)
Bestuurslid Veldeke Krink Mestreech

Es de dochter váán, woort iech – en mèt miech mien 6 breurs en zusters – op eder woord gecontroleerd zoeneet gecorrigeerd door Pa. Veer kraoge gaaroet neet de kans veur get verkierds te zègke, want heer zaot altied debovenop. In ‘t “Huilands” mochte veer evels – wie veer klein waore – hiel väöl foute make. Dat voont Pa prima. Heer griemelde get es heer ’t hoort meh corrigeerde niks. Heer lachde ziech stèllekes ’ne króf. Zoe hoort iech mie jonger zusterke ins tege mie Hollands sprekend vrundinneke zègke: “zusje kan niet boete spele want ze is krank”. ’t Keend begreep niks devaan en dach tot iech neet mèt häör wouw speule. ’t Is noets mie gans good gekoume.

Pa waor ’ne groete veurstäönder vaan ’n twietaolege opveujing. Thoes woort Mestreechs gesproke en Nederlands lierde v’r wel es v’r nao sjaol gónge. Heer waor devaan euvertuig tot veer op dees meneer later minder meujte zouwe höbbe mèt vreem taole. En achteraof gezeen kin iech allein mer concludere tot heer geliek heet gehad. ’t Kin netuurlek ouch aon de gene ligke, meh alloh, laote v’r häöm mer ’t veurdeil vaan d’n twiefel geve. Zoedus höb iech ouch mèt mien kinder altied allein Mestreechs gesproke. Iech höb get minder fanatiek gecorrigeerd es Pa zaoleger, meh toch geperbeerd ze behuurlek Mestreechs bij te bringe.

En ouch mien kinder maakde foute in ’t Nederlands. En ouch iech höb ze gelaote. Ouch iech höb zoe noe en daan ins good drum gelache. Wie miene jongste zoon tege zie Nederlands sprekend nisjeke zag: “Oh Donna, ik heb zjus zoe’n stijveltjes wie jij”. Deezelfde trouwens, heet d’n iersten tied op de lieger sjaol geweigerd um Nederlands te spreke. Heer laos ’t wel en heer sjreef ’t ouch, meh heer spraok ’t neet. Zien juffrouw waor ’n echte Mestreechse en heer voont ’t sjijns oonzin um mèt häör get anders es Mestreechs te praote. Goddaank maakde Juffrouw Jacqueline gei punt devaan en wie op inneg momint e leuk Hollands sprekend meidske bij häöm in de klas kaom, waor ’t ’m gaw euver.

Meh wie gezag. Thoes góng alles altied in ’t Mestreechs. Ouch es iech ins e breefke deneer lag veur d’n ein of andere, sjreef iech Mestreechs. Zoe höbbe mien kinder speulentere liere leze en sjrieve in ’t Mestreechs. Meh es ze mèt vrundsjes binnekaome, hoort iech dèkser tot ze ander wäörd gebruukde es tege miech. Ze spraoke euver veters en boodsjappe, terwijl ze tege miech altied rijstartele en kemissies zouwe zègke. Es iech dao daan get vaan zag, kraog iech es antwoord tot hun vrundsjes hun anders neet verstoonte! Jaomer meh woer. In deen tied dach iech wel ins tot eus Mestreechs mesjiens lankzamerhand zouw oetsterve.

Oondertösse zien ze ruim volwasse (in jaore) en aofgeloupe Vastelaovend waore ze alle drei in Mestreech. En iech höb miech köstelek mèt hun geammezeerd. Ze zinge alle leedsjes hiel hel mèt en make oonderein flawweköl euver de foute in de tekste. Mèt hun vrun en vrundinne spreke ze oonvervals Mestreechs en zoe noe en daan huur iech tot ze d’n eine of d’n andere oetlègke wat e woord beteikent of wie tot ze ’t mote oetspreke. Nein, eus Mestreechs is veurluipeg nog gans levendeg. Goddaank.

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech