Frans Tomassen
Mestreechs sjrieve lesteg?

Mestreechs spreke is ein, meh sjrieve – en daan ouch nog volgens de Veldekespelling – is ’n aander zaak. Dat höb iech oondervoonde wie iech in miert deilnaom aon ’t Groet Mestreechs Dictee. Al e paar kier veurgenome um mèt te doen; ‘t bleef bij ’t veurnumme. Dit jaor toch aongemeld en ’n eurke de grijs hersecelle laote wèrke, um ‘ns te kieke wat ’t rizzeltaot zouw zien. Nou, dat waore 42 foute (iech mein miech niks). En toen had iech miech veurgenome mien ervaring ’ns in deze column te sjrieve.

Persoenlek voont ’ch ’t dictee neet zoe lesteg. Good luustere en concentrere op de oetspraok van de wäörd is ’n vereiste. Wel had ‘ch get meujte met ’t plaotse vaan de leesteikes, wienie wel, wienie neet. Dao is ’t luustere good veur, meh daan nog mooste ’t in sommege gevalle gewoen weite.
Nao aofloup waore links en rechts get reacties te hure in d’n trant vaan “moot dat noe, wäörd die neet of nauweleks gebruuk weure”. Iech vin, dat hèlt de zaak get levendeg en ’t is zjus de sport um daan, allein op ’t gehuur, zoe’n woord toch korrek te sjrieve.
En zoe in ’t veurbijgoon hoort iech iemes vraoge: “wat is ’nen Eker?” Iech dink daan ouch: jao, daan kinste ’t wel lesteg vinde.

’t Is neet mien bedoeling te sjókkere, iech wel allein mer zègke tot me z’ch toch e bitsje moot pripperere en aondach höbbe veur grammatica en spelling es me ’t sjrieve wèlt, zjus wie bij ’t Nederlands.

Op de ierste plaots moot me ‘t ouch leuk vinde um z’ch dao mèt bezeg te hawwe. Zuug dat neet es hindernis um daan mer neet mèt te doen aon zoe’n evenemint.
Want es ’ne Ziew dat kin, boerum veer daan neet, jèh neet daan? De volgende kier gewoen weer aonmelle!

E leuk idee waors ’t um lui de gelegenheid te geve deil te numme in ’n “hors categorie” geneump “veur spek en boene”. Zoe kós me in alle anonimiteit teste of en wie good me ’t Mestreechs kint sjrieve. Iech hoort wel tot sommige mèt doge “veur spek en eier” meh dat kin ’n kwestie van smaak gewees zien. En es die categorie de smaak te pakke heet gekrege, daan kinne ze volgend jaor hiel get täofelkes en steulkes miejer deneer zette.

In de categoriejäög is de belangstelling nog summier, meh dat zal ’n kwestie vaan langen aosem zien. Ze höbbe get aanders aon de kop es ziech te verdepe in Mestreechse werkwäörd, grammatica en spelling. Meh es iech lees wat Roger Weijenbeg in ziene column sjreef euver de meneer boe-op de jäög mèt ’t Mestreechs bezig is, daan hove veer us neet oongerös te make.

Sinds kort weurt op initiatief vaan ’ne bekinde Mestreechse zenger via leedsjes en prizzentaties (Zicht op Maastricht de klas in) ’t Mestreechs op ’n späölse meneer oonder de aondach vaan de jäög gebrach. En es ‘t daan ouch nog lök tot ze ’t gesproke woord op ’n correcte meneer geit sjrieve, daan zien v’r wied genóg!

Frans Tomassen,Veldekelid
Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech