Hortense Brounts
'n Ganse week Cabberèt

Aofgeloupe zoondag alweer de lèste vaan zès Cabberètveurstèllinge gehad.

Maondelaank höbbe veer mèt de speulers en sjrijvers um de zoeväöl tied bijein gezete um te bedinke boe veer 't dit jaor ins euver zouwe höbbe. Allerhande oonderwerpe zien langs gekoume en daovaan heet e groet gedeilte de censuur neet doorstande... 't Zien altied hiel gezèllege aovende en dao weurt meistens väöl gelache. Veural euver die gecensureerde stökke, netuurlek. Eus sikkertares Els Ottenheijm hèlt bij boe veer 't euver gehad höbbe en sjik us de notule. Es veer die trökleze, bliek dèks tot Els 'ne gansen eige kiek heet op wat gezag woort zoe'nen aovend.

Eder jaor obbenuits is 't weer spannend wienie tot de ierste tekste veerdeg zien. Soms is dat haafweegs oktober, meh soms ouch pas ind november. Dit jaor waore veer sjoen op tied mèt alles. De sjrijvers höbbe genóg inspiratie én tied gehad um mer leefs 23 sketches en leedsjes te sjrieve.

Die leedsjes weurde zoe gaw meugelek bij Ben Perry - d'n directeur vaan euze combo - aofgelieverd zoetot heer de arrangeminte kin make um de muzikante aon 't werk te zètte. En eder jaor obbenuits wèt heer us weer te verrasse. Heer componeert nui leedsjes en arrangeert bekinde leedsjes mèt e - sjijnbaar? - gemaak boe veer allemaol zjeloes op zien.

Daan goon v'r rippetere. 't Groetste gedeilte gebäört thoes. Ederein perbeert zoe gaw meugelek zienen teks vaan boete te liere. Eine kier per week hawwe v'r bij eine thoes 'n teksrippetitie. En ouch die rippetities zien dèkser es eins hilarisch. Veer höbbe soms zoeväöl plezeer tot veer benajd zien tot 't op de buun allein mer kin tegevalle.
De zaankrippetities weure bij Ben op sjaol (Porta Mosana) gehawwe. De muzikante höbbe de meziek al ingestudeerd en de zengers kriege vaan Ben hoeswerk op - heer maak veur ederein 'n opnaome vaan de leedsjes - zoetot 't allemaol in 'ne korten tied "drin" zit.

Oondertösse weurt gedach euver pekskes, aonkleiing vaan de buun, versering vaan de zaol en nog väöl mie. Ouch dao is weer 'n aontal lui drök mèt aon de geng. Maddy, Peter en Frans zien veur us es speulers oonmisbaar achter de buun.

En de lui die de keertsjes sjäöre en de kiekers nao hun plaotse wieze, kinne mèt die daog ouch neet gemis weurde. Jao, 't is oondertösse 'n ganse organisatie gewoorde. En ze löp daankzij al die vrijwèllege mètwèrkers wie 'n t...

En daan... is 't obbins... gedoon... aofgeloupe...

Nao 'n ganse week vaan zinge, kemediespeule, verkleie, pruke en schminck, weurde veer gedwónge um "effe te chille"...

Veer spitse us noe al op 't koumend jaor.

Hortense Brounts
Veurzitter
Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech