Fabrizio Bongers
Levensgeneter

E tiedsje geleie woort miech gevraog um 'ne column te sjrieve veur op dees site. Es Italiaon zeende voolt iech miech zier verierd, meh daoneve ouch e bitteke oonzeker umtot 't stök oongetwiefeld in 't Mestreechs mós weure gesjreve, en neet in mien eige vertrouwde 'Italiano'. Es iech leedjes sjrijf haw iech altied d’n Digi-Dictionair örges in beeld zoetot iech gaw de correcte vertaoling veur han höb. Daoneve laot iech ze, alveurens te publicere, controlere door Bèr Dictionair. Mochte d'r daan nog foute in zitte, kin iech häöm teminste de sjöld geve!

De lèste maond höb iech bekans oonaofgebroke zitte wèrke aon m’ne nuie cd mèt es titel: ‘Extra Kies’. De mieste vaan uuch zalle de link al gelag höbbe; 'ne pizza boe extra väöl kies op zit.  Dao kin iech uuch, es iech zègk tot 't huuske oetzuut wie 'n pizzadoes en de cd wie 'ne pizza formaggio, gein oongeliek in geve.

Meh in de nui Mestreechter straottaol heet 'kies' nog 'n twiede beteikenis, wat iech uuch noe gaon explicere aon de hand vaan e veurbeeld oet 't Ingels. 't Woord "Fat" weurt in Amerika väöl gebruuk door producente vaan mèt naome rap-meziek um 't deep geluid vaan 'n drumritme in positieve zin aon te duie. De jäög vertaolde dit stopwoord nao "Vèt!" of "Hendeg Vèt Gek!" en behuurt noe tot mies veurkoumende oetdrökking in Mestreech.

"Wat 'ne kies!" hoort iech veur 't iers via Mark, veurmaan vaan de Pikkatrillaz, es reactie op 'n elpee mèt jaore '80 meziek die bij de kringloup op stoont. "Is dao daan get mis mèt?", vroog iech häöm, aongezeen iech zjus op 't punt stoont miech die plaat aon te sjaffe en d'r zeker vaan wouw zien tot mien 50 cent good besteid waore. "Nei, dao is zeker niks mis mèt, este vaan e bitteke kitsch hèls", en heer lag miech oet boe de oetdrökking 'kies' vaandan kaom.

"A cheesy movie" is dee fèlm oet d'ne jäög boevaan de speciaole effecte - dieste toen ruig voonts - in de loup der jaore zoe gedaoteerd zien tot ze d’ch ieder op d'n lachspiere wèrke es tot ze d’ch op 't puntsje vaan d'ne stool kriege. "A cheesy song" is dat leedsje mèt die euvergebruukde drumcomputer-geluidjes (toewf-toewf!), gezoonge door 'ne gas mèt zjús get te väöl haor in z’ne nek en zjús get te väöl galm op z'n stum, meh watste stiekem nog altied good vins… zjus wie dee fèlm.

Toen begós 't lankzaam tot m’ch door te dringe. Kies is kitsch, meh daan wel vaan 't soort boeste väöl plezeer aon beleefs. 'nen Touwpasseleken titel veur miene nuie cd, besloot iech. Mark reet e singelke oet 'n does boe drei kilo stöb bovenop laog. "Mooste hei zien, dit is pas ech awwe kies!" Op 't huuske waor nog mer zjus d'n titel ziechbaar: Hakke-Takke. "Mesjiens get veur diech en Jacky (Baggen)?"

En noe is 'r veerdeg en astrein gaon iech 'm bij Jacky aofgeve. Iech vraog miech aof of heer de dóbbele beteikenis zal begriepe. Iech dink 't neet. Jacky huurt naomelek bij de awwer generatie Mestreechtenere die zoe hun eige oetdrökkinge höbbe: “Dat wouw iech zègke!” Nei, de nui straottaol is aon Jacky neet besteid, of beter gezag; dao heet heer geine 'kies' vaan gegete. Meh es 't e look heet, daan drejt 'r 't! En aanders rij iech door nao de Matador en dui iech 'm in Willy z'ne jukebox. Dao zit zoeväöl awwe kies in, dao zouw 't Rommedoeke zjeloes op zien!
Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech