Ingrid Olivers
aajd prinses

DE vraog kaom zjus nao Keersmes. De snie en ‘t ies laoge nog in de straote en es veer örges nog neet mèt bezeg waore, daan waor ‘t mèt de Vastelaovend. V’r waore daan ouch hielemaol verpópzak wie DE vraog gestèld woort.

E paar nachte höbbe veer devaan wakker gelege en naotot Maurice, vaanzelfsprekend mèt goodkäöring vaan de Tempeleers, in ’t groetste geheim mèt z'ne baas had euverlag, höbbe v’r de knoup doorgehak. Veer höbbe volmondeg JAO gezag tege ’t Stadsprinssjap vaan Groet Mestreech.

De kriebels in miene boek bleve; wat e geweldeg veuroetziech, meh veural ouch “wat draag iech e groet geheim mèt miech mèt”. Iech mós versjeie zake goon veurbereie en um mer ein vaan de belangriekste te neume: iech mós genóg Eels in hoes höbbe, toch neet zoe mer e gewoen drenkske wat me in groete aontalle aonsjaf. Iech bin in ’t geniep bij drei of veer draankverkuipers gewees en höb dao ederskier get flesse gekoch. Iech waor opgeluuch wie iech die kemissie vaan mie lieske kós sjrappe.

Ederskier mós iech versjeie ingekochde waor good verstoompele veur eus kinder en de pótshölp. Ze móste veural gein vraoge goon stèlle. Dat dege de kinder toch wel es veer weer ins ‘nen aovend weg móste in verband mèt de gezèllege veurbereiinge mèt de Kanselarijraod op ‘t prinssjap. Op zekeren aovend wis iech ech gei smoesje mie te bedinke en bin in mien sportkleier vaan hoes gegaange veur miene normale sportaovend en höb later de kinder gebeld mèt de mètdeiling tot iech nog get in de kantien bleef. ’t Lege woort ederskier lesteger en veer waore daan ouch opgeluuch tot eus geheim op de zaoterdagaovend veur ’t oetrope aon de kinder, awwers en zusters kóste vertèlle. Ederein waor erg enthousias, ouch mien femilie oet Remun en Maarheeze, boeveur ’t toch allemaol get wijer aof steit.

De kinder repe oet: ‘Aoh miene gooje God, en mote veer daan op dat podium!?’ Geer höb ze oongetwiefeld gezeen, ze stoonte dao huur en voonte ’t ’n 'sjieke' ervaring, die twie pubers van us.

De zoondag vaan ’t oetrope waor netuurlek hiel apaart. Iech waor gruuts op Maurice umtot heer zie präötsje zoe good gedoon had. Iech waor blij en verras door al die leuke en soms ouch emotioneel reacties van vrun, bekinde en lui langs de kant. ’t Waor e sjoen begin en sjoen zouw ’t blieve.
 
Zoe waor dao de prinsesse-aovend boebij de aajd-prinsesse hun ervaringe mèt miech deilde. Bezeunder waor tot Jos Bovens, de ajdste aajd-prinses en tant vaan Maurice, ouch present waor. Ouch d’n aovend veur de naobers, die alles zoe sjiek en sjoen geseerd hadde in de straot, waor e momint wat miech altied bij zal blieve.

Ederein waor present, ouch eus ajdste naobers die de 80 al wied veurbij zien. Geer geluif ’t mesjiens neet, meh ’t maag wel gezag weure: de gansen aovend waore zeve Tempeleers aonwezeg die ziech in ’t zweit höbbe gewèrk en ederein vaan draank höbbe veurzeen.

Wat dach geer wijer vaan de Klevariezitting, ’t inhole vaan Maurice aon de statie, de Machseuverdrach, ’t insjete vaan de Vastelaovend, de optochte en ’t ind vaan de Carneval mèt ’t aofhole vaan ’t Mooswief. ’t Waore allemaol sjevraojmominte boe iech dèks aon zal trökdinke.

’t Sjoenste vaan ’t prinssjap vin iech evels totste zoeväöl lui blij kins make of get truus kins beeje; al die vrijwèllegers, die vaan zoe’n groete beteikenis zien veur Mestreech, ’n ernsteg kraank kinneke wat hiel gere e medaajeke vaan de prins wèlt of dat koppel wat 65 jaor getrojd is en zoe gere wèlt tot de prins eve langs kump. ’t Heet eus leve rieker gemaak en dees aajd-prinses is hiel, hiel blij tot ze dat allemaol heet kinne mètmake.

Ingrid Olivers - Schuwirth
Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech