Peter Schrijen
Mètwèrker Veldeke Krink Mestreech

Väöl vereineginge klaoge euver gebrek aon vrijwèllegers. Iech kin die verhaole en vraog daan ouch wel ’ns: “wat daot geer dao daan aon?”. De antwoorde getuige neet vaan creativiteit: “Veer hawwe acties, vraoge oonder vrun en kinnisse, sjrieve breve, zètte ’n advertentie, zeuke lui persoenlek op, jao veer doen genóg”. Miestal gevolg door de vraog: “Niks veur diech?” Es iech daan vraog: “Wat wèlste tot iech gaon doen?”. Daan is miestal ’t antwoord tot iech bestuurslid moot weure. “Dao is zoeväöl te doen, leuke vergaderinge, altied get te lache en veer vergadere mer eine kier in de maond”. Daan gaon iech doorvraoge: “meh wat moot iech daan perceis doen? Iech höb einen aovend in de week besjikbaar”. Iech daon daan nog ’n sjöp debovenop door te zègke: “jao, iech wèl diech helpe, iech weur gei bestuurslid en höb ’t liefste ’n specifieke taak die iech veural thoes kin invölle”. Daan bliek al gaw tot iech te lesteg weur. “Dat kin neet, de moos iers lid weure en daan kieke v’r wat dien taak kin zien, dat snapste toch wel?” Dat höb iech al hiel dèks gehuurd.

Boerum noe dat gans verhaol? Vereineginge zien neet zoedaoneg georganiseerd tot ze mèt zoe’n aonbod um kinne goon. Iech bin devaan euvertuig tot väöl lui wèlle helpe, meh neet oonder de condities die door de vereineginge gestèld weure. Dao laote ze kanse ligke en dat is jaomer. In dezen tied goon lui hiel gecalculeerd um mèt hunne vrijen tied. D'ch veur langere tied binde aon ’n vereineging veule väöl lui es ’n belasting en haoke daan aof. “Este zoe geis dinke goon de vereineginge nao de bliksem. Ze zien ’t cemint vaan eus samenleving”, huur iech uuch al rope. Mèt dat lètste bin iech ’t euveregens hielemaol eins.

Aajd-börgemeister Houben reep dat al in 2001 bij ’t Internationaal Jaar van de Vrijwilliger. Dao zien altied lui die dat gere wèlle doen en hun heil zeuke in ’n vereineging en dat moot ouch zoe blieve. Iech höb zelf ruim 40 jaor vrijwèllegerswerk achter miech en 23 jaor in ’n vrijwèllegersorganisatie gewèrk. Iech weet boe iech ’t euver höb. Mien advies is um in te speule op dee gecalculeerde vrijwèlleger. Dink nao euver taakpakètte. Helder umsjreve mèt e begin- en eindpunt. Vrijwèlleg is neet vrijblievend, dus gooj aofspraoke make blijf belangriek.

De vraog weurt daan aanders: “Veer zien mèt dit projek bezig en wèlle diech vraoge us te helpe. Veer kinne diech perceis aongeve wat veer zeuke. Dao ligk eus prioriteit. Zoonder verpliechting um lid te weure. Veer vraoge diech um dien deskundegheid op dat terrein. Es dat klaor is laote veer diech met rös”. Dat kump gans aanders binne. Te dèks zuuste tot ’n vereineging aon e projek begint en haverwege tot de oontdèkking kump tot bepaolde dinger neet loupe. Dat beteikent dus, altied veuraof  ’n analyse make vaan d’n activiteit, kieke wat de eige organisatie aon kin, inventarisere boe tekorte zien en mèt die vraog op zeuk nao lui die dao specifiek verstand vaan höbbe.

’t Vreug ’n aander dinkwijze, neet ingewikkeld meh wel veur väöl besture ’nen drempel euver. Wèdde tot ’t wèrk? Zoe hawwe v’r de Mestreechter Geis op peil.

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech