Hortense Brounts
nuie veurzitter

Iech zal ’t uuch mer metein vertèlle: Iech bin geinen echte Mestreechteneer. Mien ma waor vaan Sint Gietere. In de ouge vaan echte Mestreechtenere ’n boerin dus. En daobij kump nog ins, minstens eve benkelek; iech bin neet binne de Singels gebore. Um zjus te zien: iech bin óp 'ne singel gebore. Op d'n Hertogsingel um perceis te zien. Meh aon de verkierde kant. Aon d'n euverkant zoegezag. En g’r wèt: de singel is de grens en al wat dao boete vèlt, tèlt neet mèt. Noe zalt g’r zègke: 'Zoe hawwe veer wel mer wieneg échte Mestreechtenere euver'. Dat klop!

Tot geer miech – ‘n neet echte Mestreechse – zoonder verzej tot veurzitter vaan de Veldeke Krink höb gekoze! Zjus noe, wie de gezèt vol steit vaan deen échte Mestreechter Geis. Dee Mestreechter Geis dee ederein dee neet hei gebore is in klaor taol liet wete tot ‘r ziech neet demèt moot bemeuje. Allein wee de Geis heet, maag mètpraote. En dat zien 'rs neet väöl, este de gezèt maags geluive. Want dee Mestreechter Geis is get hiel speciaols. Dee höbste of dee höbste neet. Dat kinste neet liere, dat mooste veule. En de kins ’t neet zien of iemand de Mestreechter Geis heet. Dat maak 't zoe lesteg. De kins 't ouch neet ruke.
 
Soms kinste 't hure. Es eine 'wah' zeet, daan wètste 't wel. En wee mèt 'n 'harde G' aon kump zètte, dee kin 't wijer ouch vergete. Aofgesjreve, dat weurt noets get. Dee zuut hoegoet z'ne Geis kroepe. Meh da's geine Mestreechter Geis. Dee blijf veurbehawwe aon de echte Mestreechtenere.

Wat is noe eigelek 'nen echte Mestreechteneer? Dat is iemand dee zeker wèt tot Mestreech de sjoenste stad vaan de wereld is. En 't Vriethof is 't sjoenste plein en de Sintervaos de sjoenste kèrk. Vaan de wereld wel te verstoon. Allein wee dat geluif is 'nen echte Mestreechteneer. En allein 'nen echte Mestreechteneer kin de Mestreechter Geis höbbe. Noe begrep geer ouch veurwat ze in de gezèt zoeväöl sjrieve euver dee Mestreechter Geis. ’t Is 'n oetstervend versjijnsel. En gezètte zien gek op alles wat nao de hasjemedeie geit. Es 't mer örgens good mis geit, daan stoon die väöraon.

Is 't erg tot dee Mestreechter Geis aon 't oetsterve is? Meh nei! 't Zouw ins tied weure! Wie nog ‘ne groete moer roontelum de stad stoont en geine Mestreech in of oet kós zoe lang estot ze de poorte good geslote heelte, toen voolt dee Geis ziech thoes. Toen kós heer mèt gemaak ederein wies make tot dao niks boete Mestreech besteit.

Leef lui, veer zien allewijl toch wel wijzer. Mestreech is 'n prachtege stad en Mestreechs is 'n prachtege taol. Meh 't weurt tied tot euze Mestreechter Geis ziech ins geit aonpasse aon d’n tied vaan noe. Iech stèl veur tot v'r e Volks Adieu organisere veur deen awwe Mestreechter Geis. Tot veer de vinsters ins wied opezètte. Iech bin altied gruuts gewees op eus stad en op eus taol. Dat wèl iech gere zoe hawwe.

Es nuie veurzitter vaan eure Veldeke Krink wèl iech mien uterste bès doen um Mestreech en ’t Mestreechs op ’n positief en ope meneer oet te drage. Touwgaankelek veur ederein dee vaan Mestreech hèlt, veur ederein dee dat wèlt. En iech veul miech lekker toch ’n ECHTE Mestreechse.

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech