Patrick van de Weijer
Aajd Stadsprins 2009

Joonk gelierd

Op ’t momint tot iech dit stökske aon ’t sjrieve bin, doort ’t nog mer e paar daog veurtot mienen opvolger bekind weurt gemaak op de Merret. Opnui weer spannend dus!
Daan maag ..... z'ch veur veer weke de Hoegen Hoeglöstegheid vaan Groet Mestreech neume. En nao aofloup zal ouch heer zègke tot häöm ’t sjoenste is euverkoume wat ‘ne Mestreechter jong kin euverkoume. Teminste, dat ervaar iech nog ederen daag zoe en dat zal mie leve laank ouch zoe blieve!

Verleie week höb iech op ’n drei-tal sjaole ’t verhaol euver de Mestreechter vastelaovend en ziene prins vertèld aon jong kinder. ’t Waor prachteg um te zien wie eus nui ginneratie zier geïnteresseerd waor in dat verhaol! Zie wete noe oondermie boerum vastelaovend weurt gevierd, wie ’t oets oontstande is en wat de rol vaan ‘nen hoeglöstegheid in dat verhaol is.
Iech stoont verstèld vaan de aondach en gooj vraoge die zie stèlde. Dat gaof miech in eder geval op dees sjaole ’t geveul tot dee Mestreechter Vastelaovend nog springlevend is.

Dat kump in ierste instantie netuurlek door d’n invlood vaan de awwers vaan de kinder, meh ouch door de betrokkenheid vaan sjaole die mie en mie de boetewereld nao binne aon ’t hole zien. ’t Is vaan belang tot veer dat veural ouch zoe hawwe. Wat miech persoenelek betröf is dat zelfs mien daogelekse taak op ’n aontal Mestreechter basissjaole, dus aon miech zal ’t neet ligke!

Meh ouch veur aander Mestreechter cultureel oonderdeile is dat belangriek. Zoe wie eus eige taol en typische Mestreechter tradities en gebruke. Tegeliekertied mote veer ouch ope stoon veur de nui meneer vaan dinke, communicere en handele vaan die nui ginneratie, um meh neet die aonsleting te misse.

Wat miech persoenelek betröf, meh zeker ouch es keersveerse Tempeleer, ligk dao ’n enorme oetdaging. ’t deit miech däög tot iech op straot mekelek weur aongesproke door jongere vaan 4 tot 18 jaor en dat wèl iech vashawwe. Want dao ligke de kanse! Spreek mèt dees jong lui, meh veural, luuster ouch nao hun, want ouch zie höbbe gooj ideeje. Es veer die jong lui mèt hunne vernuiende en verfrissende kiek op de wereld, en tegeliekertied mèt respek veur tradities, protocol en gebruke, oonder d’n erm numme höbbe veer euver viefteg jaor nog altied al die sjoen zakes in Mestreech wie de vastelaovend, reuzestoet, heilegdomsvaart, broonk, preuvenemint, en zoe wijer. Veer mote die jong lui ouch op tied bij al betrèkke, dat hèlt ’n vereineging of aander organisatie fris en alert én vaan dezen tied.

E good veurbeeld wat betröf de vastelaovend zien dus de sjaole, meh ouch tijdens de vastelaovend de gróppe jong lui in d’n optoch, de populariteit vaan Mestreechter leedsjes, de jäögprinse in de wieke, de jäög-aofdeilinge vaan de plaotseleke hermenie in de boetewieke, enz.

Iech höb verleie jaor es prins in eder geval gezeen tot ’t kin en tot veer ouch de koumende jaore nog hiel väöl sjoens kinne beleve in eus sjoen stad Mestreech

Väöl plezeer en v’r zien us!

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech