Els Ottenheym
veurzitter Veldeke Krink Mestreech

E nui sezoen...  E nui Veldekejaor!

Inderdaod, nao e paar weke rös zien veer weer 'aon de geng' gegaange mèt Veldeke. Heineve kint g'r leze euver de taolmiddag vaan euze Veldeke Krink.

’t Waor ‘ne leuke, intrèssante middeg. G'r had nog get kinne liere vaan euzen taolmeister Flor Aarts; wat kin dee mins good oonderwieze. Zie book is beslis ‘nen aonraojer veur de leefhöbber vaan 'Maastrichtensia'.

De taolkemissie had ziech oetgesloof um de lui e paar plezerege eurkes te bezörge. ’t Waor gezèlleg, ech awwerwèts Veldeke. Wat höbbe veer creatief lede! Op de website kint geer de creaties, alias limericks leze.

Wat altied good in de smaak vèlt zien die aw Mestreechter oetdrökkinge. ’t Book Good En Geisteg Gezag steit vol devaan. Mèt väöl plezeer höb iech veur de taolmiddeg dat book in han genome en gegriemeld euver al die kösteleke gezègkdes die eus taol riek is. 

Wat kinne veer väöl oetdrökkinge euver de stoolgaank. Wat dach geer vaan:  ‘ne naakse in z’n tes sjiete, of dee sjit hoeger es ze gaat en  heer heet mie mojles es sjiet!  Gei woonder tot Veer höbbe sjiet aon de lui d’n tophit is mèt de vastelaovend. Iech dink tot d’n tied riep is um dat book mesjiens obbenuits te goon oetgeve.

Höb geer trouwens nog kinne naogoon wat 'dee heet ’n freis um op te bäöme' beteikent?

Veer goon e nui  sezoen tegemoot. In  december kump ‘ne sjoene keersmiddag en daan prizzentere veer uuch ind jannewarie weer e nui Vastelaovends Cabberèt. Veer weure noe al aongesproke en gebeld euver ’t cabberèt: “Wienie is ‘t?”, “Wienie kinne veer kaarte kriege?”, “Mote veer ech in de rij goon stoon?”

Mèt zoe'n 900 lede, boe veer hiel blij mèt zien, weurt ’t lesteg um ‘t ederein ’t nao de zin te make, zoonder tot ‘t  houwe, biete, kretse weurt bij de kaartverkoup en bij de veurstèllinge in de Bonbonnière.

’t Bestuur heet daorum beslote um de kaarte zoe ierlek meugelek te goon verdeile. Dat wèl zègke: veldeke-lede mage astrein twie kaarte per lidmaotsjap koupe in de veurverkoup. "Wie dat noe moot goon mèt de kinder, mèt de naoberse, mèt de petenoonk, ’t nisjeke of de achterpeerdsneef?" Die höbbe inderdaod pech… die mote wachte op de vrije verkoup naoderhand. Of gewoen ouch lid weure vaan euze krink.

Nao de taolmiddag, boe veer dit al bekind hadde gemaak, höbbe z'ch al de nudege lui aongemeld es nui lid.

Gelökkeg höbbe v'r väöl lede die neet allein veur ’t cabberèt lid zien gewore. Die zien lid umtot ze begriepe tot veer väöl mie doen. Ze zien dèks al jaorelaank lid, umtot ze us wèlle steune bij al die aander activiteite en projekte. Neet veur niks wèlle veer us profilere mèt oonderwerpe euver eus moojertaol, euver Mestreech en euver de cultuur vaan eus stad.

Mèt al die activiteite perbere veer uuch weer e plezereg Veldekejaor aon te beje. Höb geer suggesties? Laot ’t us wete, veer höbbe gere te doen mèt lui die mètdinke!

Veer zien us!

Mèt de compleminte naomes eur bestuur,

Els Ottenheym

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech