Lei Bovens
mètwèrker Krink Mestreech

MVV (deil II)

Recent höb geer op dees plaots ‘ne column kinne leze vaan Jef Loontjens euver ’t begrip “Sjeng”. Jef doog daorin op ’n ammezante meneer verslaag vaan ’n interview vaan ‘ne reporter vaan ‘ne commerciëlen tèllevisiezender mèt ’n aontal supporters vaan MVV die ziech allemaol Sjenge neume. En daan maak ’t neet oet vaan wat veur geslach totste bis. Ouch vrouweleke MVV-supporters neume ziech jummers Sjenge. Jef heet dat nog ins wijer oetgedeep en kaom daobij tot get verrassende conclusies. ’t Is tot Jef dat heet oetgezeuk aanders had iech ouch neet gewete tot Mestreechtenere die ziech Sjeng neume eigelek boere zien of ze zouwe touwvalleg Sjeng mote heite. Zoe lierste nog ins get este e gratis abbonnemint höbs op de website vaan Veldeke Krink Mestreech.

 

Mèt eur permissie höb iech miech ins verdeep in ’t “Sjenge”-gehalte in de selectie vaan ’t ierste èlftal vaan MVV. Um te jenke, kin iech uuch vertèlle. Lès späölde veer veur de play-offs ‘nen oetwedstrijd tege De Graafschap in Doetinchem. In ’t oetvak stoonte 300 Sjenge die ziech de longe oet hun lief sjriewde en zoonge um die vaan us ’n hart oonder de reem te steke. De res vaan ’t stadion waor gevöld mèt boere, die in d’n Achterhook gruuts drop zien door ’t leve te goon es “Superboere”. Kint geer naogoon wat dat in de confrontatie tösse de Sjenge en de (super)boere veur ‘ne sfeer heet opgelieverd. Wie MVV op veursprong kaom waore die 12.000 Superboere op ‘ne slaag stèl en goonsde de strijdkreet “Sjenge, Sjenge, Sjenge ……” door stadion de Vijverberg. Iech zaot op de baank langs ’t veld en kraog de sjevraoje devaan. Wie iech weer e bitsje tot miech zelf waor gekoume vroog iech miech aof wat veur Sjenge door eus supporters feitelek woorte aongemoedeg. Iech bekeek miech nog ins de opstèlling en kaom daobij tot de geleujetege oontdèkking tot welgetèld eine Sjeng in ’t veld stoont. Dee luusterde nao de naom Brenny Evers. Veur de res lepe bij MVV allein mer neet-Sjenge roond. “Zouwe dat daan allemaol boere zien?”, vroog iech miech aof. Neet ierlek netuurlek umtot bij de tegepartij ouch allein mer boere roondlepe. Wat moot eine Sjeng daan tege zoeväöl boere oetriechte? Tot veer dao mèt 2-2 geliek höbbe gespäöld maagste daan ouch e woonder neume! Gans opvallend waor tot bij die vaan us, boete euze Brenny, nog neet ins e paar Limbörgers, laot stoon hollenders späölde. De res vaan ’t team waor samegestèld oet 6 Belzje, ‘ne Fransmaan, ‘nen Törk, ‘nen Deen en ‘ne Pruus.

Euzen Törksen trainer, bijgestande door zienen hölptrainer oet Meersse, wisselde tijdens de wedstrijd twie Belzje en dee Fransmaan veur nog ‘ne Fransmaan, ‘ne Pool en eine oet Afrika. Iech had compassie mèt deen erme Brenny. En heer mèt miech, num iech aon.  

 

Veur aonvaank vaan de thoeswedstrijde vaan MVV in stadion De Geusselt zingk Beppie Kraft of Angelina ummertouw ’t Mestreechs volksleed. Dat weurt daan oet volle boors door de MVV-supporters op de tribuun mètgezoonge. Wie ziech dat bij ’t speule of zinge vaan e volksleed huurt stoon de twie èlftalle en ’t arbitraol trio daan stief in ’t gelid. ’t Zal uuch neet verbaze tot op ’t veld bij die vaan us oonderhand hoegoet de melodie bekind in de oere klink. Geine dörf mèt te zinge en es ze dat al zouwe dörve, zouw geine wete wat heer zóng. Noe moot iech ierlek touwgeve tot iech ouch neet metein zouw wete wieste “Jao diech höbs us aon ’t hart gelege” in ’t Frans, Duits, Deens of Törks oetspriks.

 

Trök nao ’t gering “Sjenge”-gehalte in ’t ierste èlftal vaan MVV. Dat waor vreuger, pakweg 40 jaor geleie, gans aanders. Toen späölde hiel get Mestreechtenere in ’t ierste. Kint geer uuch de naome vaan François Herben, Giel Haenen, Nico Mares, Michel Thal, Jef Dresens, Albert Ummels, Pummy Bergholtz, Jo Bonfrère, Pie vaan Dijk en Jo Tonnaer (wèt g’r wel, dee vaan de glaashandel op de Kommel, dee thoes mèt ‘ne bal dèks zien eige roete insjoot) nog rappelere? De Mestreechs gekleurde èlftalle woorte in die jaore gecompleteerd mèt e paar Limbörgers, boe-oonder Willy Brokamp oet Chèvremont en Frans Körver oet Sjinne. Aof en touw doge ouch nog get Hollenders en boetelenders mèt, zoewie Co Prins, Gerry Mühren, Bert vaan Marwijk (euzen huidege bondscoach) Ivan Mraz oet Tjechoslowakije, Janus Kowalik oet Pole en Jippy Laïne oet Finland, meh daan hadste ’t ouch gehad.

 

In deen tied waor evels nog gein spraoke vaan ’t zinge vaan ’t Mestreechs volksleed veur ’t begin vaan de wedstrijd en toen woort de ploog nog neet aongemoedeg mèt “Sjenge, Sjenge, Sjenge”. Iech zouw wel ins wèlle wete wie dat toen op euze ploog zouw zien euvergekoume. Die hadde gegarandeerd de ouge vaan emotie neet druug gehawwe. Kint g’r ‘t nog volge of mooste soms ‘ne boer zien um zoeget te snappe? 

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech