Lei Bovens
mètwèrker Krink Mestreech

MVV

E tiedsje trök woort miech gevraog um aoventouw ‘ne column veur de Veldeke Krink Mestreech te sjrieve. Gaank dao mer ins aonstoon este diech zouws mote mete mèt al die gerinnommeerde tekssjrijvers die Veldeke riek is. Este daan ouch nog ins door Els en Hortense ’t mets op de keel gezat krijgs, kinste geine kant mie op. Zelfs de 21 foute die iech mèt opzat tijdens de editie 2009 vaan ’t Groet Mestreechs Dictee höb gemaak, waore neet genoog um oonder ’t verzeuk, um tot ’t columnistecorps touw te trejje, oet te koume. ’t Gemiddeld aontal foute laog jummers op 27, dus mien score waor nog neet ins zoe slech, este de score vaan dee Ziew veur ‘t gemaak ins eve boete besjouwing lies.

 “Boe-euver zouw iech daan get mote sjrieve?”, waor mien wedervraog aon Veldeke. “Maak niks oet, es ’t mer leuk is!”, kraog iech es antwoord. Dao mós iech ’t mèt doen.  Oongeluiflek inspirerend moot iech zègke. Netuurlek zien dao altied wel oonderwerpe die us in ’t daogeleks leve bezeg hawwe en die qua actualiteit de meujte weerd zien um in ‘ne column aondach aon te sjinke. Zoewie ’n artikel euver ‘ne Ziew dee hei effekes mèt de beker vaan ’t Groet Mestreechs Dictee devaandoor is gegaange. Get um diech es rasechte Mestreechteneer kepot veur te sjaome. Pa zaoleger zouw ziech in zie graaf umdrejje es heer dat al neet heet gedoon heet wie bekind woort gemaak tot MVV in Törkse han euvergeit.

Mèt dat lèste höb iech geliek ’n thema te pakke boe iech ’n aontal columns mèt zouw kinne völle. MVV steit jummers in de Mestreechter gemeinsjap weer volop in de belangstèlling. Op sjaol, op straot en in de kaffee is MVV allewijl bijnao dageleks oonderwerp vaan gesprek. Noe moot iech zègke tot dat veural ligk aon de rizzeltaote vaan de lèste twie seizoene. Veer doen weer mèt veur de prijze en daan kin ’t chauvinisme vaan d’n doorsnei MVV-supporter neet mie kepot. Nao twie euverwinninge achterein sjriewt dee al tot veer Europa in goon! En veer höbbe dit seizoen al hiel get kiere twie kier achterein gewónne, kint geer naogoon. Die vaan Real Madrid, Chelsea, Liverpool en Barcelona sjiete noe al in hun brook.

De beteikenis vaan MVV veur de stad Mestreech is in sportief en sociaol-maotsjappelek opziech neet te oondersjatte.
’t Is e bindmiddel veur alle laoge vaan de Mestreechse sameleving. ’t Roed-wit MVV-hart klop in minneg Mestreechs hoeshawwe.

De gezètte höbbe de lèsten tied vol gestande mèt artikele euver ’n eventueel fusie tösse Fortuna Sittard en Roda JC. Umtot de provincie neet wouw mètbetaole is die fusie aofgebloze. Dao heet euze gouverneur geinen hoond meh ‘ne kater aon euvergehawwe. Kint geer uuch veurstèlle wie die oet Sittard of Kèrkraoj (eus supporters zègke dao “boere” tege en tege Kèrkraoj weurt Aoke-Noord gezag), ziech zouwe höbbe geveuld es Fortuna en Roda waore opgegaange in Sporting Limbörg? ’t Had neet väöl gesjeeld of MVV had in 2003 ouch neet mie bestande. In deen tied stoont MVV aon de rand vaan d’n aofgroond vaanwege groete financieel probleme. Gelökkeg is MVV die probleme debove-op gekoume en is nog neet zoelang geleie de 107e verjaordaag gevierd “vaan de club oet Mestreech, die al góng ’t ins neet, noets de mood verlore heet”, althans zoe geit ‘ne regel oet ’t couplèt vaan ’t clubleed vaan eus MVV-ke.

Mèt permissie wèl iech uuch ‘ne volgende kier get mie euver MVV vertèlle. Iech höb daobij ’t veurdeil tot iech es lid vaan de teambegeleiding vaan ’t ierste èlftal get korter bij ’t vuur zit en daoneve mekelek touwgaank höb tot historisch mattriaol. En es ’t eve kin zal iech die informatie lardere mèt get smakeleke anecdotes. Dat maak ’t leuk en dat is wat Els en Hortense miech es kemissie höbbe mètgegeve.

Mesjiens lök ’t miech ouch um deen Törk dee eus MVV-ke veur neet minder daan 750 doezend euro veur de hèlf heet euvergenome, get beter aon uuch veur te stèlle. Este dee zouws mote geluive geit heer nog mie geld in MVV duie zoetot veer astrein ech europees voetbal goon speule. Wie iech dat laos in de gezèt dach iech tot iech de vastelaovendsgezèt vaan d’n Tempeleer in m’n han had. Dao steit jummers ouch allein mer oonzin in. Iech höb trouwens hure vertèlle tot Bilgiç, want zoe hèt dee gooje maan, es tegeprestatie heet gevraog um in ’t vervolg veur edere wedstrijd Beppie Kraft ’t Törks volksleed te laote zinge in plaots vaan ’t Mestreechs volksleed. Dat is nog zwoer geheim dus vertèl ’t ezzebleef neet wijer.

Lei Bovens

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech