Roelf Welkenhuizen
Bienvenue!

’n Dikke week geleie laos ’ch in de gezèt ’n artikel mèt d’n titel « Bienvenue chez les Sjengs ». ’n Verwijzing nao dee prachtege Franse fèlm boe-in me aontuint wie de combinatie vaan vrundsjap en aonpassingsbereidheid de veuroordeile en cultuurblindheid vaan ’ne nuikoumer euverwint. Oondaanks d’n titel geit me in de gezèt evels ’ne gans aanderen toer op…

David Deprez vaan fèlmhoes Lumière vint tot cultureel eveneminte in Mestreech mie zouwe mote doen veur neet-Nederlandstaolege lui in Mestreech. Me moot daobij dinke aon Ingelstaolege oondertiteling vaan fèlms, of bovetiteling in ’t Ingels in d’n theater. Prima, zouwste zègke, zoe’n miertaolege oonder- of bovetiteling. Veur wee regelmaoteg nao de cinema op ’t Belsj of nao d'n opera in Luik geit, zal ’t niks nuits zien. Eve draon wene, mie neet.

Bij zoe’n twie- of miertaolege bovetiteling zouwste ouch Nederlands liere, weurt gezag. Dat is evels mer de vraog… in de cinema in Belsj mooste al gaw leze este niks wèls misse vaan de oondertiteling. Die erm aanderstaolege… zeet geer ze al zitte ? Sjijns rösteg in hunne zedeleer in d’n theater of de cinema, vluig dao alles aon hun neus veurbij en mote ze aocherm neve ’t volge vaan ’t verhaol ouch nog Nederlands liere. Toch wel oongemekelek en ’t kos m’ch mieljaar ’nen aordege cent !

Alles is betrèkkelek, dat weet iech. Meh dao moot miech toch get vaan ’t hart. Iech höb e groet probleem mèt de meneer vaan dinke. E probleem wat miech es taolemins väöl leid deit. E probleem wat dinkelek neet gaw opgelos kin weure: ’t is naomelek e mentaliteitsprobleem. E mentaliteitsprobleem wat noe ouch in Mestreech is aongekoume. De cultuurvervlaking.

Zeet ins ierlek: höb geer al ins ’ne Spaonse student in Mestreech Nederlands hure spreke? Zelfs ’t groetste deil vaan de Pruse nump ziech neet de meujte um z’ch in hun 4 of 5 jaor studie in Mestreech ’t Nederlands aon te liere, oondaanks de betrèkkelek kleinen aofstand tösse ’t Duits en ’t Nederlands. Meh jeh, veurwat zouwste dat ouch doen este aon Ingels allein genóg höbs? Dinke in terme vaan rentabiliteit: mèt ’n minimaol inspanning e maximaol rendemint bereike. Meujte, inzat en versjeieheid liekene veis wäörd te zien gewore. ’t Begrip aonpassing waor dat al väöl langer : ’t moot alle neet-Nederlandstaolege in Mestreech zoe gemekelek meugelek weure gemaak, ze veural neet teväöl in de weeg lègke, want aanders zien ze zoe weer eweg. Stèl diech veur tot ouch mer eine, mèt e sjoen Mestreechs woord, expat ziech de meujte zouw doen um Nederlands te liere. Um nog mer te zwiege euver eus Mestreechter taol. Perbeert mer ins drei jaor laank in Luik, Madrid of Roeme te leve zoonder e woord Frans, Spaons of Italiaons te liere. Höbbe veer soms e minderwierdegheidscomplex t.o.v. eus eige taol en cultuur ??

’t Idee vaan menier Deprez um expats en aanderstaolege studente mie te betrèkke bij cultuurmanifestaties in Mestreech steun iech veur de volle 100%. Meh iech zèt groete vraogteikes bij e compleet Ingelstaoleg aonbod : vergruutste daomèt neet zjus d’n aofstand tösse díe lui en sprekers vaan ’t Mestreechs of Nederlands ? Zeker in ’n stad die gere Cultureel Hoofdstad vaan Europa wèlt weure in 2018, kinste cultuursplitsing en -vervlaking daobij ech neet gebruke.

En zoewiezoe Mestreech Cultureel Hoofstad ? Mote nóe al miljoene miljoene euro’s weure gepoomp in e projek boevaan ’t doorgoon nog gans oonzeker en mesjiens ouch wel volstrek oonzinneg is ? Get mie besjeienheid zouw hiel good passe. Of vint geer ‘t allemaol zoe plezereg : ein groete otofiel in de weekends vaan december, dee fantastische, geweldege, prachtegen trein nao Breussel dee d’n haven tied neet rijt, Mestreechtenere die ziech op zaoterdag neet mie in hun eige binnestad riskere ? Mestreech weurt geleef in plaots vaan zelf te leve.

En jeh, laote v’r ierlek zien... wat is Mestreech in de ouge vaan väöl vaan mien boetelandse leeftiedsgenote ? Twie weke geleie waor iech mèt e paar kammeraote e weekend in de Ardenne. ’s Aovends get drinke in ’ne gezèllegen dörpskaffee… kump e meidske op us aof en zeet : « Vous n’êtes pas d’ici ? » Iech zègk wie altied toch wel gruuts : « Ah non, nous sommes de Maastricht. » Häör reactie… ’ne lach en daan die ein beweging… ron lippe en twie trèkskes aon ’nen denkbeeldege joint tösse twie vinger. Allez, bienvenue à Maastricht !

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech