Twajn Weijenberg
Acteur Cabberètgróp

’t Zwart Look

Oonder de lèste cabberètveurstèlling vaan aofgeloupe zoondag, woort mèt ’ne gekke slaag gezag: “Jeh jonges, en daan mörge ’t zwart look!”

Iech kin uuch gerös stèlle. Es d’r al e look zouw zien, daan zouw dat e fijn look zien, want iech dink tot veer content mage zien. Geine vaan us zit noe bubbelentere thoes aof te kicke. Zelfs Phil heet inins geine las mie vaan ‘Parkinson’.

Euze gróp heet genote daankzij ’t publiek dat zoe enthousias waor, tot ’t us in de oetveuringe leet greuje. De reacties zien euverweldegend. Ze belle, ze maile, ze spreke d’ch aon op straot. De huurs: “zoenen aovend is ’t bèste medicijn” en “verleie jaor waor geweldeg, meh dit waor nog beter”.

Tot de lui content zien, bliek ouch oet ’t explosief aontal nui lede, dat ziech heet aongemeld. Veer zalle in eder geval oplètte tot veer neet neve eus sjeun goon loupe.

Aofgeloupe maondag, geer wèt wel, d’n daag mèt dat look, bin iech mèt Phil eus koffers mèt attribute in de Bonbonnière goon hole en denao höbbe veer nog ’n tas koffie gedroonke. Heer had ’t nog dreuver tot ’t succes ’t gevolg is vaan ’t feit tot ’n aontal kwaliteite in euze cabberètgróp samekoume. De speulers höbbe ’n jaorelang ervaring, dus dao hoofste neet väöl aon te sjaove. Ze kinne speule en zinge. Veer höbbe gooj sjrijvers veur de sketches. Veur de leedsjes höbbe veer ouch gooj sjrijvers, die dao ouch nog de zjuste meziek veur zeuke en vinde. En es d’r nog geine meziek is, componeert Ben Perry geweldege nuie meziek. Euze combo deit ’t fantastisch en pas perfek in ’t cabberètpleetsje. En neet te vergete de lui die us vaan alle kante oondersteune, zoetot veer ’t op de plaanke kinne laote zien.

Iech huur ouch tot ’t lang wachte op die trappe ’n pinnetentie is. Es ’t kós, zouw iech dao bès get euver ’t cabberèt wèlle koume vertèlle en e paar moppe wèlle tappe, meh dat geit neet, want geer snap wel... iech bin daan op vaan de zenewe!  Geer moot mer bedinke: geer höb betaold veur alles wat in de zaol gebäörd. Alles wat daoveur gebäörd, dus ouch dat wachte, krijg geer gratis en veur niks debij. En boe krijgste allewijl nog get veur niks?

’t Kump good? Gelökkeg is ’t allemaol good gekoume!

Hopelek höbbe veer veur 2010 weer genóg leuke ingevinge. Will zouw zègke: “ ’t mage ouch doorgevinge zien.”

Tot volgend jaor es God bleef!

Twajn Weijenberg

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech