Iwan Bruijnzeels
De kredietcrisis

Kredietcrisis in Mestreech

De kredietcrisis, tjeh, dao is al väöl euver gezag en gesjreve. Toch wèl iech dao mien deil ouch euver zègke.

Iech bin daan wel gesjaold es econoom, hei aon de –wat toen nog hètde - de Rijksuniversiteit Limburg, meh iech wèl gein ingewikkeld financieel besjouwing devaan make. Iech wèl de kredietcrisis es ‘ne kans aon uuch veurlègke en zoe ‘ne positieven drej geve aon, wat iech ein groete lochbel vin.
Want zjus wie die torie-hoeg aondeilekoerse lochbelle waore, zien de leeg geloupe slappe balönnekes vaan noe ouch lochbelle.
Dao zien bedrieve die aon aondeile minder weerd zien es tot hunne groond, hun gebouwe en hun machines same op marktplaats.nl zouwe oplievere. Dat is toch vaan de gekke!

Meh, nondedju, dao gaon iech toch ’n economisch betoog hawwe en dat waor sjus neet de bedoeling vaan euzen doorgaons toch klöchtege en löstege column hei op Maastricht-FM.

Dus obbenuits. De kredietcrisis.
Veer bij de Veldeke Krink merke dao gaaroet niks vaan. Of mesjien zjus wel!
Wie geer wèt is dit d’n tied vaan ’t jaor, zoe es ’t op de Vastelaovend aongeit, tot veer drök aon de geng zien mèt eus Veldeke Vastelaovendscabberèt.

Op 4 jannewarie begós de verkoup vaan kaarte aon lede en op 10 jannewarie aon neet-lede. Nou, dat höbbe gewete! ’t Leep störm!
Binne die ierste week waore bekans alle kaarte weg!
Oondaanks euze nuie regel tot Veldeke-lede maximaol mer twie lui mage mètnumme. Dee regel waor veurgend jaor neet.
De speulers en muzikante höbbe z’ch daan ouch gepeers geveuld um nog ’n veurstèlling te speule! En nao twie daog waor ouch die oetverkoch!
Bekans 2500 kaarte in 10 daog! Vint geer dat nog normaal?
Nou, iech wel! Dat kump allemaol door dee kredietcrisis. Netuurlek!
Bedink uuch ‘ns: hoegwierdeg live entertainment, ‘nen gansen aovend laank en dat veur slechs 14 euro veur lede en veur slechs 18 euro veur neet-lede! Dat is toch uniek!
Ederein is ingepraot tot v’r veurziechteg mote zien mèt eus verdeende centekes en veural zuineg te zien.
En daan veur zoen astronomisch lieg bedraag ‘ne gansen aovend lache, genete en veural vergete tot de kapitaol neet mie besteit umtotste zoe vertrouwe in die Belzje vaan Fortis hads… Dat is toch ‘ne kans dee kinste neet laote ligke!
Bekans 2500 kaarte in 10 daog! Alabonneur! Hopelek tot ’t volgend jaor dee crisis veurbij is, aanders höbbe v’r aon tien veurstèllinge neet genóg!
Iech verheug miech noe alweer drop tot v’r us kinne begaoje –plat gezag- in die aw kloete! Nog 18 daog…

Dat cabberèt heet ouch ‘nen houp lui doen beslete um lid te weure vaan euze Krink. V’r zien in twie jaor e lid of twiehoonderd gegreujd nao 769 lede! Alabonneur! En dat zien nog ‘ns ins zoeväöl lui! Koppele tèlle es ei lid. V’r wèlle gein houwelekse probleme op eus aofrope!
Dus iech stèl tot die 769 lede minstens 1200 lede zien!
V’r höbbe dus mie lede es tot ambtenere zien in Mestreech!
Mie es tot lui lid zien vaan alle politieke partije same in Mestreech!
Mesjien mote v’r zelf ’n politieke partij opriechte…! VVD: Veldeke Veur Democatie,  PvdA: Partij Veldeke deit Alles, nei de bèste: CDA: Chauvinisme Daankzij Awkloete.
Nein, aw leefdes bleuje miech noe te biesteg op, iech draaf door.

Trök nao eus nui lede.
G’r daot euze Krink te kort es g’r allein veur ’t goojekäöpke lid zeet gewore. Of allein lid zeet gewore veur eus cabberèt. Veer doen zoeväöl mie!
Alleh, e tipke vaan de sluier daan: In miert eus jaorvergadering mèt denao de prizzentatie vaan ’t 1001 quizvraogebook euver Mestreech. Oonthulle plaquèttes in april. taolmiddag in mei, wandele in juni, Limbörgse sjèlders in september, wandele euver d’n Tongerseweeg in oktober, keersmès in december! En daan vergeet iech allezeleve ouch nog get!
En dat allemaol um eus Mestreechs en Mestreech in al zien glorie te iere, te behawwe en laote veurt leve.

Deh, euvertuig? Wèlt g’r lid weure? Dat kint op www.veldekemestreech.nl. Veur 24 euro per jaor!
Op nao d’n 800ste!

Iech wins uuch ‘ne plezerege kredietcrisis, e plezereg weekend en tot volgende week, Es-God-Bleef.

Iwan Bruijnzeels,
Mestreech, 16 jannewarie 2009

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech