Els Ottenheym
veurzitter Veldeke Krink Mestreech

Nuijaor

Vint geer ’t ouch zoe gaw goon? Gans vaan allein zien veer in ’t jaor 2009 gekoume... gek toch, dao hoofste niks veur te doen.

Mèt nuijaor moot iech altied dinke aon kinderkes die in de pyzjema ’s mörges vreug bij pap en mam de slaopkamer koume binnesloepe, um hun nuijaorsveerske op te zègke...

Gans zenewechteg en stamelentere, want ’t is toch al zeker mier es ’n week geleie tot ze mèt de juf geoefend hadde, weurt ’t gediech gebrach. Pap en mam beluustere ziech e bitteke duf de creativiteit vaan hun kinder, want ze hadde ’n Sylvesterparty en ze wouwe liever nog get oetslaope...

Wèt geer ’t nog?

Lieve papa en mama,
Op deze dag in het nieuwe jaar,
sta ik met mijn versje klaar.

Op mien sjaol perbeerde iech toch altied get in ’t Mestreechs te make... dat kloonk zoe vertrojd! Iech moot dinke aon ’t prachteg verhaol vaan Fons Olterdisse: De nuijaorsbreef. Dee besjrijf gans wie dat bekans 90 jaor geleie draon touw ging. De zuus ’t veur d’ch: zoe’n 50 jungskes in de klas die in “schoonschrift, mèt kruunsjespen”, op speciaol pepier de nuijaorswins, dee de meister op ’t zwart bord mèt kriet veurgedoon had, mooste euversjrieve... Kinder mèt de tóng oet de mojl, doedsbenajd um vlekke te make, want daan kaom de meister en dee verkoch d’ch ’n watsj.

Mèt bombastisch taolgebruuk woort in ’t Huilands ’t gediech kier op kier opgezag. Oonsterfelek gewore zien de wäörd: “Lieve ouders en geer ouch peer en meer”... de kinder snapde jummer niks vaan ’t gans gediech.

Wie aanders geit ’t allewijl: zelfs kleuters liere al op de computer hun veerske sjrieve... Tjeh... tije verandere. Veer vierde aajd op nui mèt vrun. Daan koume de verhaole: wètste nog, vreuger kraoge veer ’n hart vaan sjókkelaat of nuijaorscent en vuurwerk... meh m’ne leve, dat waor gaar neet debij. Wie m’n zusters en iech in de veerde klas zaote, noe gróp zès, mochte veer wie Pie Sumpelmans boete um twelf oor mèt vaan die funkelsteerkes stoon te zwejje, de knalle mooste veer mer zelf make... pang... meh gezèlleg waor ’t!

Nuijaor... trökkiekend nao ’t aajd jaor vaan Veldeke mage veer hiel content zien. Mèt zoe’n 745 lede zien veer oonderhand ’n groete club aon ’t weure. Veer vaan Veldeke vinde eigelek tot veer ein groete femilie zien: Mestreechtenere die geve um hun taol en hun stad en dao gruuts op zien, zoonder euverdreve chauvinisme! ’t Mestreechs leef en dao zien veer hiel blij mèt... aoch en huurste daan nege vaan de tien kier: fijn däög, daan winste de lui dat ouch, meh daan mèt de naodrök op plezerege daog en veural ZAOLEG NUIJAOR.

Veer kinne content zien euver 2008, ’t cabberèt ind jannewarie waor e groet succes, de stadswandeling boetegewoen en neet te vergete: veer begóste in september 2008 mèt gesproke columns bij R.T.V. Mestreech... De keersviering in de Festivillage waor daankzij de Mestreechse Operètte Vereineging oonder leiing vaan Ben Perry hiel sjoen en good geslaag. De lui höbbe de keersgedachte op ’n plezerege meneer mètgekrege. Dao zörgde de verhaolevertèllers, Will Wintjens, Twajn Weijenberg en Hortense Brounts en oondergeteikende veur. Keersemes moot d’ch, zeker zoe op ’t ind vaan ’t jaor, e good geveul geve...

Noe goon veer mèt väöl plezeer beginne aon eus nui cabberètprogram: vaan 4 t/m 8 fibberwarie weurt dat op carnavaleske meneer veur de lui gebrach in de Bonbonnière. ’t Weurt e bitteke houwe, biete, kretse mèt de kaartverkoup, want väöl Veldekelede wete tot veer mèt oonvervalste humor Mestreech en de lui die dao woene op de hak numme. ’t Combo vaan Ben Perry späölt aw vastelaovendsleedsjes en die weure enthousias mètgezoonge! Vaanaof 10 jannewarie is de vrije verkoup via de Uitbalie in d’n Theater aon de Vriethof. Heet ’t uuch tegegezete veurgend jaor, höb geer wel ins de mismood in, las vaan de credietcrisiskrenkde,  petaj mèt eur femilie, veer wete ’t zeker: ’T KUMP GOOD!

Dat is d’n titel vaan eus cabberèt!

Dat hawwe veer us en uuch veur in ’t nui jaor:

Veer vaan Veldeke winse uuch e good, gezoond en veural e zaoleg 2009!!!!!!

Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech