Els Ottenheym
Veurzitter Veldeke Krink Mestreech

Allerziele

Veurgende week belde Twajn, of iech mèt wouw goon um 't graaf vaan Fons en Guus Olterdisse te pótse. 't Zaog neet oet en veur Allerziele mós dat toch in orde zien! Jehmeh, Allerziele, dat weurt toch 'gehawwe' op 2 november, meinde iech. Nein, de plechtegheid zouw op 26 oktober zien!

Gewaopend mèt 'ne sjróbbeurstel, ummers en sjoorspunskes trok iech nao d'n Toongerseweeg. Twajn en zien vrouw Maddy hadde 'n groete kalbas bij ziech mèt flesse werm water, greun zeip, negelbeurstelkes en plastic hejse, want 't graaf zaog nogal oonnötteg oet. 't Heet 'n prachtege ligking, aon die rotonde. Meh die buim, dao kump miech nogal get rotzooi vaanaof, de stein waor gans greun oetgeslage.

Wie iech aonkaom laog Maddy op häör kneje te vrieve um 't portrèt vaan Guus weer good herkinbaar te make. Iech begós aon Funs. "Zo menier Funs, veer goon dee knievel vaan uuch ins good fatsoenere…" zag iech, häöm euver zie geziech käörend. Heer lachde wie ummer, vruntelek bove zie brèlke, zoene sjieke pince-nez, oet.

"Deh," zag Maddy, "Jonges vaan Olterdisse, wie vint geer 't um door twie vrouwlui ins good oonder han genome te weure? Dat had geer toch neet gedach nao zoe väöl jaor…" Twajn maakde e nui luterke en pakde de sjróbbeurstel…noe woort ECH good gepóts.

Oondertösse kaome de manslui vaan de begraofplaots ins kieke wat veer allemaol aon 't doen waore en ze begóste aon de baank tegeneuver 't graaf. Twajn maakde e präötsje en späölde veur opziechter. De jonges zatte de maste veur de veendele. Jao, zwoer werk huur, meh 't moot toch allemaol pico bello in orde zien veur zoondag. En al die blajer menier, hadde veer 't gezeen? Die hadde ze al sjoen opgeruimp.

Nao drei kerteer waore veer wied veerdeg. Twajn pakde plechteg de beurstel en declameerde mèt de rechterhand op zien boors: "Jao diech höbs miech aon 't hart gelege. Mestreech door alle iewe heer"… 't Waor zjus of ze luusterde: de gebreurs Olterdisse, sjrijver en componis vaan 't Mestreechs Volksleed.

Mèt de ummers en de beurstele ging iech wijer nao 't graaf vaan mien awwers. Oonderweeg kaom iech alderlei bekinde tege: "Ouch goon pótse?" Jao, iech waor ouch goon pótse, dat huurt ziech zoe. "Wat 'n blomme… Veur wee zien die?"
"Pa heel zoe vaan dahlia's hè?"
"Jao en mèt keersemes kump weer get gans aanders op zie graaf." Iech zeen 't al veur miech: 'ne keersmaan dee de stein opkleddert MÈT lempkes op z'n möts, sjoen huur. Gaot mer ins kieke tege de keersemes! Daan kriege de lui wat dao ligke gezèlsjap vaan de keersmaan en keerskikzjozerije!

Raar toch tot 26 oktober Allerziele weurt herdach. Dat waor vreuger toch aanders. Toen hadde veer vrij op Allerheilege en Allerziele. Wie iech keend waor, woende veer aon d'n Awwe Wolderweeg, tegeneuver de Theresiakèrk, dat waor eigelek 'ne zandweeg toen. En eine kier per jaor waor 't drök. Op Allerziele, daan gónge de lui nao 't kèrkhof, via de Toongersweeg op en trök kaome ze d'n Awwe Wolderweeg, noe defteg eweg Athoslaan geneump, aof. Veer tèlde de oto's en loerde us de ouge oet. Op Allerheilege mochte veer veur d'n ierste kier eus nui zoondagse winterkleier aon, neet ieder! Noe is dit jaor op 2 november koupzoondag, de tije verandere.

Iech leep nao d'n oetgaank en zaog al die herfskleure bove de viuulkes, crysante, herfsasters en blomstökke. Wat heet die begraofplaots prachtege buim. Symbool vaan vergaankelekheid, meh eder jaor greuje en bleuje ze obbenuits en toen dach iech aon de leihertege wäörd vaan Olterdisse oet Trijn de Begijn, de kemikken opera: "Wat is het leven… een stap naar het graf, wat heden bloeit, valt morgen af…"
Els Ottenheym (01.11.2007) - Lees wijer
Phil Dumoulin (29.12.2007) - Lees wijer
Peter Reijnders (22.01.2008) - Lees wijer
Richard Jongen (19.02.2008) - Lees wijer
Hortense Brounts (09.04.2008) - Lees wijer
Roelf Welkenhuizen (20.06.2008) - Lees wijer
Mgr. Fons Kurris - Lees wijer
Roger Weijenberg - Lees wijer
Els Ottenheym - Lees wijer
Els Ottenheym - Lees wijer
Iwan Bruijnzeels - Lees wijer
Twajn Weijenberg - Lees wijer
Hortense Brounts - Lees wijer
Roelf Welkenhuizen - Lees wijer
Jef Loontjens - Lees wijer
Lei Bovens - Lees wijer
Lei Bovens - Lees wijer
Els Ottenheym - Lees wijer
Patrick van de Weijer - Lees wijer
Hortense Brounts - Lees wijer
Peter Schrijen - Lees wijer
Ingrid Olivers - Lees wijer
Elly Theunissen - Lees wijer
Fabrizio Bongers - Lees wijer
Hortense Brounts - Lees wijer
Frans Tomassen - Lees wijer
Frans Budé - Lees wijer
Will Wintjens - Lees wijer



Digi-Dictionair
Agenda

Copyright © 2013 Veldeke Krink Mestreech